Қазақстан Жазушылар одағы Басқармасының Төрағасы Мереке Құлкеновтің бастамасымен ұйымдастырылған Қасымхан Бегмановтың он бес томдық кітаптарының тұсаукесері ерекше форматта өтті. Бұл айтулы шара ақынның 50 жылдық шығармашылық жолын және ұзақ жылғы қажырлы еңбегінің нәтижесін кеңінен атап өту мақсатында ұйымдастырылды. Мереке Құлкенов тұсаукесердің «жылжабар» жоба ретінде жүзеге асатынын атап өтіп, оның дәстүрлі кітап тұсаукесерлерінен өзгеше болуына ерекше көңіл бөлді. Ақын шығармашылығының әр түрлі жанрларын қамтыған он бес томдық кітаптар қазақ әдебиетінің ауқымды көрінісін ұсынады. Кітаптардың алғашқы екі томында өлеңдер топтастырылған. Үшінші томда ақынның естеліктері, эсселері, мақалалары мен сұхбаттары, сондай-ақ драмалық шығармалары енген. Төртінші томда халық этнографиясы жайлы жазылған сыр-сұхбаттар мен эсселер, бесінші томда дін, мәдениет, өнер қайраткерлерімен жүргізілген сұхбаттар жарық көрді. Алтыншы және жетінші томдарда Қазақстанның танымал тарихшылары мен этнографтарымен сұхбаттар мен ғылыми зерттеулер, ал сегізінші томда әртүрлі облыстар мен елдерге жасаған сапарлар жайлы жазылған жолжазбалар ұсынылған.
Тұсаукесер барысында кітаптардың мазмұны кеңінен таныстырылып, жазушының шығармашылығына қатысты көптеген тың пікірлер айтылды. Эстрада жұлдыздары жазушының сөзіне жазылған әндерді орындап, шараның әрін әнмен арттырды. Шараның модераторлығын Әміржан Қосанов жүргізді, ал телеканалдар мен басылымдар айтулы шараны кеңінен жариялады. Сондай-ақ ақын еңбегі, оның шығармашылық ізденісі мен ғылыми зерттеулерінің нәтижелері, сондай-ақ ұлттық мәдениет пен тарихқа қосқан үлесі осылайша көпшілікке таныстырылды. Әр томда жаңа деректер мен тың материалдар оқырмандарға ұсынылды, бұл кітаптар тек әдебиет саласындағы ғана емес, ұлттық мұра мен тарихты зерттеу тұрғысынан да маңызды орын алады.
Бұл тұсаукесер – жазушының жарты ғасырға созылған шығармашылық өмірінің, сондай-ақ оның әдебиетке қосқан үлесін мойындау мен бағалаудың бір көрінісі. Жаңа жыл қарсаңында өткен айтулы шара қазақ әдебиетінің болашаққа деген үмітін арттыра түсетіні сөзсіз. Шара соңында тұсаукесерге атсалысқан ағайынға алғыс айтқан Қасымхан Бегманов, келе жатқан жаңа жылдың елге жақсылығымен келуін тіледі. Бұл кітаптар қазақ әдебиетінің бай мұрасын келешек ұрпаққа аманаттап, елдің мәдениетіне қосылған зор үлес болып қала бермек.